Tolma / Խաղողի Տերևներով Տոլմա

Այսօր պատրաստեցի ու ձեզ եմ ներկայացնում թփով տոլմայի պատրաստման ձևը: Տոլմա պատրաստելիս միշտ հիշում եմ մեր ռուսերենի դասախոսին Ագուլյանին, 2-րդ կուրսի վերջում մենք ունեինք (դիֆ զաչոտ) էսպես ասեմ, որ հասկանալի լինի:)))), ու մեր ստուգումը հանձնելու ու բարձր գնահատական ստանալու համար ինքը մշակել էր մի հիանալի մեթոդ. Պետք է քննության նման կարդայինք և պատասխանեինք Իլիականն ու Ոդիսականը, որի շնորհիվ մանրակրկիտ իմացա այդ գեղեցիկ պատմությունները, բացի այդ աղջիկները պետք է իմանային իրենց մայրենի լեզվով օրորոցային (սովորել էինք, առանց կատակի) ու մեկ էլ պետք է տոլմա պատրաստած լինեինք:))))))))) (այ մենակ տոլման չէի պատրաստել, բայց դե մանրամասն մամայից հարցրել էի, որ քննությանը չկտրվեի:))))))

ԲԱՂԱԴՐՈՒԹՅՈՒՆԸ

0.5 կիլոգրամ տավարի աղացած միս

100 գրամ խոզի սալ

3 գլուխ սոխ

0.25 բաժակ բրինձ

0.25 բաժակ բլղուր

250 գրամ լեչո կամ 3 ճաշի գդալ տոմատ

2 թեյի գդալ ծիտրոն

5 ճյուղ մաղադանոս

5 ճյուղ համեմ

1լիտրանոց շշով խաղողի տերևներ

100 գրամ կարագ

աղ, սև պղպեղ

1.Աղալ միսը, սալը և սոխը: Եթե ձեր տավարի միսը յուղոտ է, կարող եք սալ չավելացնել կամ սալի փոխարեն ավելացնել կարագ: ՈՒղղակի տոլյաի մսի համի համար շատ կարևոր է յուղոտ լինելը:

2. Ավելացնել բրինձն ու բլղուրը, կանաչիները, համեմել աղ ու սև պղպեղով:





3. Լեչո կամ տոմատ հիմնականում չեն լցնում թփով տոլմայի միջուկի մեջ, բայց ես այդպես պատրաստեցի: Նայեք ձեր ճաշակին ու ցանկությանը: Լավ մասսան խառնում եք, լավ կլինի ձեռքով:





4. Խաղողի թփերը զգուշությամբ հանում եք շշից և տաք ջրով լվանում, քամում:








5. Զգուշությամբ բացում ենք խաղողի թուփը, մեջը լցնում մեր լցոնից մոտավորապես 1 թեյի գդալի չափով :









6. Երկու կողմերը ծալեք, ինչպես նկարում է և փաթաթել:

7. Շարեք փաթաթված տոլմաները լայն կաթսայի մեջ, իրար կողք-կողքի ու շարքերով բարձրացեք այնքան, մինչև ձեր լցոնը վերջանա:

8. Տոլմայի վրա շուռ տված ափսե դրեք: Եփվելուց աղացած միսը ուռելու հատկություն ունի, որի ժամանակ մեր տոլման կխառնվի իրար և գեղեցիկ դասավորվածությունն ու իրենք կարող են փոփոխվել: Վրան լցրեք սառը ջուր, ջուրը լցրեք այնքան, որ ափսեն ծածկվի ջրով: ՈՒ դրեք կրակին, սկզբում կարող եք բարձր կրակին դնել, բայց երբ սկսի եռալ ցածրացրեք: Եռալուց համտեսեք աղի չափը, եթե պետք է ավելացրեք, նաև ջուրը , եթե զգաք քչացել է, մի փոքր ավելացրեք, իսկ մոտ 20 րոպե հետո տոլմայի վրա լցրեք կտրատած կարագը:

9.  Տոլմայի եփվածությունը զգալու համար պետք է  վերցնեք մի հատը վերևի շերտից ու ուտեք, եթե խաղողի թուփը փափուկ է, իսկ միջի բրինձը եփված, ուրեմն մեր տոլման եփված է: Մատուցեք տաք վիճակում:

ԲԱՐԻ ԱԽՈՐԺԱԿ