Mushroom Tart / Սնկով Բլիթ

Այս բլիթի (պիրոգի) ձևը ես վաղուց էի նկատել իմ ամերիկյան թխվածքների ու Ջուլիա Չայլդի գրքի մեջ և   գլխումս պտտվում էր, թե ինչ համադրությամբ այն պատրաստեմ: Վերջերս շերտավոր խմորի գնդեր ունեի, ու չէի կողմնորոշվում, թե  ինչ պատրաստեի և ի վերջո որոշեցի պատրաստել սա...

ԲԱՂԱԴՐՈՒԹՅՈՒՆԸ

2 գունդ շերտավոր խմոր

Միջուկը

2 գլուխ սոխ

500 գրամ հավի դոշ

500 գրամ շամպինիոն սունկ

3 ճաշի գդալ բուսայուղ

աղ և սև պղպեղ

1 ձու վրան քսելու համար

1. Սոխը, սունկը և հավի դոշը մանր կտրատել, լցնել թավայի մեջ ու բուսայուղով տապակել` ավելացնելով աղ և սև պղպեղ:

2. Տապակելուց հետո միջուկը թողնել, որ սառչի:

3. Խմորներից մեկը հանել սառնարանից և գրտնակել թավայի չափով: Գրտնակելուց հետո տեղադրել թավայի մեջ:

4. Թավայի մեջ տեղադրած խմորի վրա լցնել ողջ միջուկը և հարթեցնել` բոլոր եզրերից թողնելով 2-3 սմ տարածք:

5. Հաջորդ խմորի գունդը հանել սառնարանից, գրտնակել թավայի չափով ու երկայնքով ծալել, ինչպես նկարում է:

6. Ծալելուց հետո ծալված մասից սուր դանակով ճեղքեր արեք` եզրերից թողնելով 2-3 սմ տարածք:

7. Այնուհետև զգուշությամբ այն տեղադրեք միջուկի վրա ու բացեք խմորը: Վրան քսեք հարած ձուն: Պատառաքաղի օգնությամբ եզրերը սեղմելով նախշեր տվեք խմորին ու դրեք 200 աստիճան տաք ջեռոցում, մոտ 30 րոպե: 

8. Երբ մեր պիրոգի երեսը կարմրի, ուրեմն այն պատրաստ է հանում ենք ջեռոցից: Այն կարելի է մատուցել և տաք, և սառը վիճակում:

ԲԱՐԻ ԱԽՈՐԺԱԿ