Liver With Mustard / Տապակած Լյարդը Մանանեխով

Լյարդին սովորաբար հայերս անվանում ենք ՍԵՎ ԹՈՔ, այսինքն մեր մսավաևառներին դիմելիս անպայման պետք է սև թոք ասենք...

Նշեմ, որ տավարի լյարդը այն հազվագյուտ մսի տեսակներից է, որն իր մեջ պարունակում է համարյա թե բոլոր վիտամիններն ու հագեցած է սպիտակուցով, այդ իսկ պատճառով խորհուրդ եմ տալիս այն հաճախակի պատրաստել: Լյարդը պատրաստելիս չի կարելի այն երկար ժամանակ թողնել ջրի մեջ, քանի որ նրա միջի արյունը /հետևաբար օգտակար տարրերը/ դուրս են գալիս ու լուծվում ջրին: Լյարդը պատրաստելիս հարկավոր է այն արագ լվանալ ջրով ու քամել, լյարդի վրա գոյություն ունի բարակ թաղանթ, այն հեռացնելիս շատ ավելի արագ կեփվի լյարդը ու նրա վիտամինները երկար եփվելուց չեն քայքայվի: Պետք չէ լյարդը մանր կտրատել, որքան մեծ -մեծ լինեն կտորները, այնքան ավելի օգտակար. ինչպես նաև համեղ, կլինի այն:

Նշեմ, որ հետևյալ բաղադրատոմսն ու խորհուրդներիս մի մասը վերցրել եմ հայտնի ու իմ սիրելի Ջուլիա Չայլդից:

ԲԱՂԱԴՐՈՒԹՅՈՒՆ /4-6հոգու համար/

700գ / 6կտոր տավարի կամ հորթի լյարդ

1/2բաժակ ալյուր

1բաժակ հացի մանրացրած պաքսիմատ

3ճաշի գդալ մանանեխ /ցանկալի է Դիժոն տեսակի/

1միջին չափի սոխ

1հատիկ սխտոր

3ճյուղ մաղադանոս

70գ կարագ

3ճաշի գդալ ձեթ

աղ և սև պղպեղ

1.Արագ լվանում ենք լյարդը` առանց  ջրի մեջ երկար թողնելու, քամում ենք և հեռացնում վրայի բարակ թաղանթը: Այնուհետև կտրատում ենք 1սմ հաստությամբ մեծ կտորներ: Լյարդը կարող եք այսպես կտրել, հարմար է:

2. Լյարդի կտորները աղով ու պղպեղով համեմում ենք, լայն ափսեի մեջ լցնում ենք ակյուրը և լյարդի կտորները թաթախում ենք ալյուրի մեջ: 

3.Թավայի մեջ լցնում ենք ձեթի ու կարագի մի մասը  ու տապակում ալյուրոտ կտորները, ամեն մի երեսը 1րոպեի չափով, լյարդը մի փոքր կձգվի ու կկարմրի, բայց ամբողջովին եփված չի լինի:

4.Խորը ափսեի մեջ լցնում ենք մանանեխը, ավելացնում ենք աղացած կամ ճզմած սոխն ու սխտորը, կտրատած մաղադանոսը ու լավ խառնում ենք, որ ստացվի հավասարաչափ զանգված:

5. Զանգվածը քսում ենք տապակած լյարդի կտորների վրա:

6. Լայն ափսեի մեջ լցնել պաքսիմատը:

7. Լյարդի կտորները թաթախում ենք պաքսիմատի:

8. Թավայի մեջ լցնում ենք մնացած փեթն ու կարագը ու դնում կրակին, երբ այն լավ տաքանա, թավայի մեջ դասավորեք լյարդի կտորները ու տապակեք, այնքան մինչև երկու կողմերը լավ կարմրեն:

9. Մատուցեք այն տաք վիճակում, բրնձի, հաճարի կամ կարտոֆիլի հետ:

ԲԱՐԻ ԱԽՈՐԺԱԿ