Carbonnades A La Flamande /from French cuisine/ / Տապակած Միս Ֆլամանդական Ձևով

Այս ռեցեպտը ես նույնպես վերցրել եմ Ջուլիա Չայլդի հայտնի գրքից, պատրաստման տեսակետից այն շատ հետաքրքիր էր ու համեղ, իհարկե Բուֆ Բուգինիոնն ավելի համեղ էր ինձ համար, բայց դե հո միայն Բուֆ Բուգինիոն չենք պատրաստելու անընդհատ? Լավ սկսեմ նկարագրել այս Կարբոնադս Ա Լա Ֆլամանդե ճաշատեսակի գաղտնիքները:




ԲԱՂԱԴՐՈՒԹՅՈՒՆ. 4-5 հոգու համար


1կգ տավարի փափուկ թարմ միս
50գ խոզի սալ կամ 100գ տապակման ձեթ
400գ սոխ
3 հատիկ սխտոր
3բ չեխական բաց գույնի, թեթև /light/ գարեջուր
2բ տավարի մսի արգանակ կամ ջուր
6 ճյուղ մաղադանոս
0.5թգ ուրց
1 դափնու տերև
1.5թգ օսլա
աղ
սև պղպեղ 


1. Եթե օգտագործելու եք խոզի սալ, ապա առաջին հերթին այն մի փոքր ջրում եփեք 5-10րոպե:

2. Այդ ընթացքում կարող եք կտրատել տավարի միսը 1սմ հաստությամբ և 510սմ լայնությամբ ու երկարությամբ:



3. Եփված սալը քամեք ու լցրեք տապակվող թավայի մեջ ու դրեք կրակին, երբ այն յուղ դուրս տա, ավելացրեք միսը ու երկու կողմը տապակեք 1-2 րոպեի ընթացքում:


4. Դրանից հետո մսի կտորները վերցրեք կրակից ու թղթե սրբիչով սրբեք դուրս տված արյունն ու հեղուկը:

5. Այնուհետև նորից մսերը շարեք թավայի մեջ ու երկու կողմը լավ տապակեք, որ կարմրեն:

6. Կտրատեք մեծ-մեծ սոխը և տապակեք նույն թավայի մեջ ու ավելացրեք սոխին ճզմած սխտորը, խառնեք ու դրեք  մի կողմ:

7. Վերցրեք 5-7սմ խորությամբ ջեռոցի տարա ու մսի կտորների կեսը շարեք մեկ շերտով ու  համեմեք աղ ու պղպեղով:

8. Այնուհետև վրան լցրեք տապակած սոխի կեսը:

9. Տարայի մեջ նորից լցրեք աղով համեմված միսն ու սոխը: Ավելացրեք վրան գարեջուրը, տաքացրած 1բ արգանակ, ուրցը, դափնու տերևը, մաղադանոսի ճյուղերը և, ծածկելով տարան, տեղադրեք նախապես 250 աստիճան տաքացրած ջեռոցում: 10-15 րոպե մնալուց հետո ջեռոցի ջերմաստճանն իջեցրեք 150-180 և թողեք այսպես եփվի 2-2.5 ժամ:

10.Երբ զգաք, որ եփվել է, հանեք ջեռոցից, հեռացրեք մաղադանոսն ու դափնու տերևը, և միջի հեղուկը լցրեք խորը թավայի մեջ: Ստացվելու է մոտ 1-1.5 բաժակ հեղուկ, 1 բաժակ մնացած արգանակի մեջ լցրեք օսլան լավ լուծեք մեջը և ավելացրեք հեղուկով թավայի վրա: կրակին դրեք ու խառնեք, մինչև կստացվի խիտ կիսելի նման սոուս: Հանեք կրակից և լցրեք մեր պատրաստի մսի վրա: Եթե այն մատուցելու եք առանձին ափսեով, կարող եք միսը դասավորել ափսեի մեջ և միայն հետո ավելացնել սոուսը: Մատուցեք տաք վիճակում` կարտոֆիլի կամ բրնձի հետ:

ԲԱՐԻ ԱԽՈՐԺԱԿ