Ratatuy from French cuisine / Ռատատույ ֆրանսիական խոհանոց

Երևի տեսել եք համանուն մուլտֆիլմը, իսկ եթե չեք տեսել, ուրեմն անպայման նայեք: Այդ մուլտֆիլմը նայելուց առաջին հերթին ցանկություն է առաջանում փորձելու այդ առնետիկի ամենահաջողված ճաշատեսակը, որն էլ ես երեկ փորձեցի պատրաստել: Այն շատ համեղ ամառային թեթև ճաշատեսակ է:  Ratatouille  ֆրանսերենից թարգմանված նշանակում է` rata-  կերակուր, toiller- խառնել, լուծել:
Նախ ասեմ, որ ես սխալներ ունեցա, սոուսը շատ էի պատրաստել, և այդ իսկ պատճառով ես ձեզ ներկայացնում եմ սխալներս ըստ իս ուղղած ձևով: Հաջողություն ձեզ....


 ԲԱՂԱԴՐՈՒԹՅՈՒՆԸ /4-6 հոգու համար/


Սոուսի համար

2 մեծ պղպեղ լավ կլինի կարմիր և դեղին
2 միջին չափի լոլիկ
2 հատիկ սխտոր
2 միջին չափի սոխ
1թգ մանրացրած ուրց
մի պտղունց աղ


Հիմնական լցոնի համար
2 սմբուկ
2 դդմիկ 
3-4 լոլիկ
մի պտղունց աղ
լավ կլինի, եթե դդմիկի, սմբուկի լոլիկի լայնությունները հավասար լինեն


Վերին լցոնը
կանաչի ըստ ցանկության /ես համեմ ու մաղադանոս էի վերցրել/
5ճգ ձեթ
2-3 հատիկ սխտոր
մի պտղունց աղ
սև պղպեղ

1. Նախ պղպեղները կրակի վրա խորովում ենք, այնքան, որ կաշին սևանա, այնուհետև նրանց փաթաթումենք պոլիէթիլենային տոպրակի մեջ: Այսպես պղպեղները խոնավանում են ու հեշտությամբ վառված կաշին դուրս է գալիս, խորոված սմբուկի ժամանակ էլ այս մեթոդը շատ օգտակար է: Պղպեղները թողնում ենք 5-7 րոպե մնա:

2. Այդ ընթացքում կտրատում ենք սոխն ու սխտորը, լցնում թավայի մեջ ու տապակում 3-4 րոպե:

3. Մաքրում ենք կաշվից պղպեղները, կտրատում ու ավելացնում սոխառածին:








4. Այդ ընթացքում քերիչով անցկացնում ենք լոլիկը ու ավելացնում մասսային:





5. 5-7 րոպե եփվելուց հետո, երբ մի փոքր թանձրանում է մեր զանգվածը, վերցնում ենք կրակից ու թողնում մի փոքր սառչի, որից հետո այն լցնում ենք բլենդեռի մեջ և ստանում ենք միասեռ սոուս:

6. Սմբուկը, դդմիկն ու լոլիկը կտրատում ենք կլոր-կլոր/ ինչպես նկարում է/ բարակ շերտեր /շատ հարմար է այստեղ օգտագործել հատուկ քերիչներ, որոնք նույնանման հաստությամբ կարող են կտրատել բանջարեղենը/:

7. Ջեռոցի տարայի մեջ /որը պետք է ունենա 5-7 սմ խորությունև լավ կլինի, եթե այն կլոր լինի/ լցնում ենք մեր պատրաստի սոուսը ու ավելացնում մեկ կամ երկու փոքրի դափնու տերև:

8. Տարայի մեջ սկսում ենք դասավորել պարույրի /спирал/ ձևով մեր կտրատած բանջարեղենը, ինչպես նկարում է:

9. Այնուհետև անցնում ենք վրայի լցոնի պատրաստմանը կտրատում ենք կանաչին, ճզմում սխտորը, ավելացնում ձեթը, աղն ու պղպեղը ու խառնում:








10. Այս լցոնը հավասարապես բաշխելով լցնում ենք մեր պարուրաձև բանջարեղենի վրա:

11. Տարան փակում ենք կափարիչով կամ փայլաթիթեղով ու դնում նախապես տաքացրած ջեռոցում 180 աստիճան ու եփում ենք 40-50 րոպե: Ընթացքում կարող եք բացել և ստուգել, եթե եփվել է հանեք ջեռոցից կամ հակառակը ավելի երկար եփեք:

12. Երբ եփվել է մեր Ռատատույը, հանեք ջեռոցից 5-10 րոպե թողեք թող հանգստանա և մատուցեք տաք վիճակում` ինչպես տարայով, այնպես էլ զգուշությամբ տեղափոխելով խորը մեծ ափսեի մեջ:

ԲԱՐԻ ԱԽՈՐԺԱԿ